मोरङ जिल्ला प्राचीन कालमा विराट राजाको राजधानी र मध्यकालमा विजयपुरमा विजयनारायण पछि पाल्पाली सेन राजाको राज्य भित्र रहेको इतिहास छ । मोरङ जिल्लाका एक विराटनगर महानगरपालिका ८ नगरपालिका र ८ गाउँपालिकाहरूमध्ये बेलबारी नगरपालिका एक हो । मानव बसोबासको इतिहास र पुरातात्त्विक प्रमाणहरूको आधारमा लगभग तीन हजार वर्ष अघिदेखि बसोबास गरिआएको बेतना सिमसार क्षेत्रको पुरातात्त्विक प्रमाण र लगभग आठ सय वर्षभन्दा अगाडिको धनपालगढी क्षेत्र रहेको यो बेलबारी नगरपालिका हो । आधुनिक नेपाल निर्माणपछि ३५ वटा जिल्लाहरू हुँदा हालको मोरङ, झापा, सुनसरी एउटा जिल्ला मोरङ रहेको थियो । यो बेलबारी नगरपालिका मोरङ जिल्लाको लगभग मध्य भागमा रहेको छ ।

ऐतिहासिक कालमा यो क्षेत्र घना जङ्गलले ढाकेको थियो । अहिले पनि राजमार्ग उत्तर क्षेत्र जङ्गलले नै ढाकिएको छ । पुराना बुढापाकाहरूको भनाइ अनुसार त्यस समयमा यहाँको जङ्गल क्षेत्रमा प्रशस्त बेलको रुखहरू पाइने हुनाले कालान्तरमा यस क्षेत्रको नाम नै “बेलबारी” रहन गएको हो । अर्थात् बेलै बेलको घारी भएको हुनाले यस भेगको नाम बेलबारी रहन गएको भन्ने भनाइ रही रहेको छ । नेपाल सरकारबाट २०७१ साल वैशाखमा साबिक बेलबारी र कसेनी गाउँ विकास समिति मिलाएर नगरपालिका बने पछि सङ्घीय राज्यको संरचना अनुसार पुन: २०७३ को राज्य पुनर्संरचना पश्चात् बेलबारी नगरपालिकामा साबिक डाँगीहाट र बाहुनी गाउँ विकास समिति गाभिएर हालको बेलबारी नगरपालिका बनेको हो । यस नगरपालिका हाल ११ वटा वडाहरूमा विभाजन गरिएको छ । बेलबारी नगरपालिकाको कुल ‍१३२.७९ वर्ग कि.मी. क्षेत्रफलमा फैलिएको छ ।